Moral Philosophy of Socrates

 سُکریٹیز ءُ مڑاہداریں زند ءِ شوہاز

_________________________

امین ضامن بلوچ

 

سُکریٹیز (Socrates 470-399 BC) ءِ رِدءَ پہ انسان ءَ بائد اِنت کہ 'وتا بزانت'[1] ءُ 'وتا جوٛان، راست ءُ ادبداریں فکراں گوں بہ زانت‘[2] ۔ اے وڑا 'انسان ہمنچو وتا بہ زانت، ہمنچو آئی ءِ زند مڑاہدار[3] بیت۔ مڑاہداریں زند زانت ءَ گوں ہمسنگ بیت، بلکیں زند ءُ زانت یکین بنت'[4]۔ چونائیا انسانی زند ءُ زانت ءِ مولءُمراد 'زانگ' اِنت[5]۔ انسان ءِ وتارا زانگ یا وتی ءِ ذات ءِ پہم، آئی ءَ مڑاہداری ءَ ابید دِگہ ہچ نیمگا نہ بارت[6]۔ پرچاکہ 'وتا زانگ پہ انسان ءَ بنیادی ھیر (good) اِنت'[7]۔ وتا زانگ بزاں وتی تب، وتی (فکری) ھد ءُ بند، بود، سکین، نیّت ءُ شخصیت (personality) ءِ دُراہیں تک ءُ پہناتاں زانگ[8]۔

ذات ءِ زانگ ءِ پَدءَ انسان پہ وتا ستک ہم ودی کنت[9] ءُ انسان وتی ہر ستک ءَ گوں 'دانائی ءَ تپّاسیت ءُ پکہ کنت'[10]۔ دانائی انسان ءَ بیرگیں راستی یے دنت …. راستیں فکر دائم انسان ءَ راہءراست ءَ کاریت؛ ءُ راہءراست انسان ءِ مڑاہداریں زند اِنت[11]۔ چونائیا انسان ہما وہد ءَ مڑاہداریں زندے گوٛازینت کنت وہدے آ وتی راستیں 'بائداں' بہ زانت۔ اے بائدانی زانگ پہ ’انسانی گہبودی ءَ اَلمی اَنت۔ اے وڑا انسان ءِ ہر کار راستیں فکر ءِ رِدءَ گیشّان بنت‘[12]۔ بزاں انسانی کار ءُ کِردانی بُن اسلی زِہ فکر اِنت۔ 'پہ گہبودی زندے ءِ گوٛازینگ ءُ راستیں فکر ءِ زانگ ءَ انسان ءَ وتی ذات ءِ رِدءَ ہر لیکہ تپّاسگ ءُ چکاسگی اِنت کہ انسان ءِ ذات ءِ زانت آئی ءَ اے درجا ءَ کاریت کہ زانت پہ ہر کس ءَ اِنت‘[13]۔ زانت چوشیں چیزے نہ اِنت کہ انسان ءَ مہ رَسیت….  'زانت پہ انسان ءَ پمیشکا لازم اِنت کہ اے انسان ءَ آریپ کنت'[14]۔بیدء زانت ءَ نہ انسان راہءراست ءَ کیٛت ءُ نہ نیکیں کارے کُت کنت …. چونائیا ہم ءَ انسان شَرّی ءِ واہگ داریت[15]۔ کس پہ زانت رَدی نہ کنت[16]۔ اگاں چوشیں مردمے ہست کہ رَدیں زندے گوٛازینگ ءَ اِنت، گڑا بزان پہ اے زند ءَ رزا نہ اِنت …. پرچاکہ زانت ھیرواہ اِنت، ءُ انسان گوں وشیں دلے، پہ زانت بدواہ نہ بیت‘[17]۔ چونائیں زند ءَ 'رَدیں کار ہما کنت کہ زندئِے نہ چکاستگ ءُ نہ تپّاستگ۔ اے وڑیں مردم نازانتکار اَنت، ءُ رَدیں کار چہ ہمے نازانتکاری ءَ بنت‘[18]۔

 وہدے کسے راست ءَ بہ زانت گڑا راستیں کار کنت[19]۔ 'راستیں کار انسان ءَ مڑاہدار کنت ءُ مڑاہداری ءِ جوٛانیں وشی یے ہست۔ راستیں کار نہ تہنا پہ انسان ءِ جند ءَ سیت اِنت بلکیں وشدلیں ساہتانی مانزمان اِنت ہم'[20]۔

چونائیا اوں سُد ءُ سمائیں انسانے رَدیں کار ءَ گچین نہ کنت، پرچاکہ رَدیں کار ءِ گچین کنگ ءَ چہ انسان ءِ ارواہ زوال آماچ بیت'[21]۔ 'انسان ءِ ارواہ  ماں آئی ءِ دانائی ءَ جاہ کنت، ہمے دانائی اِنت کہ مردم ءَ انسان کنت …. پہ انسان ءَ بائد ہم ہمیش اِنت کہ وتی دانایں سِپتاں گوں ایدگہ سِپتانی سرا ھاکم بہ بیت‘[22]۔ سُد ءُ سمائیں انسان ءِ بود ءُ زِکت آئی ءَ اَنچیں ہنر ءُ گُشادی یے بکشنت کہ آ دائم آریپ مانیت [ایشی ءَ سُکریٹیز Aréte گوٛشیت ءُ ما ں بلوچی ءَ ما پہ ایشی ءَ ھیرواہی ءِ پہم ءِ گالبند ءَ کارمرز کنیں]۔ انسان ءِ آریپی انسان ءَ ھیرواہ کنت۔ 'ھیر ہما انسانی کِرد اِنت کہ آئی ءَ تاوان بار نہ کننت ءُ نہ اے پہ انسان ءَ بے سیت بنت۔ بلکیں یک پہمیدگیں انسانے ءِ زند ءِ مولءُمراد ہم ہمیش اِنت کہ آئی ءِ ادبداری جوٛانتر بہ بیت‘[23]۔ پرچاکہ مڑاہداری ءَ چہ مستریں شَرّی نیست؛ ءُ ہمے شَرّی ہر انسان ءِ تہا (کہ آ وتا زانت یا وتی ذات ءَ سرپد اِنت) یک وڑا یک ھساب ءَ مانیت…. مڑاہداری  یا انسانی گہبود چوشیں رہبند نہ دارنت کہ اے رہبند نفر ءِ جند ءِ پسند ءِ رِدءَ وہد پہ وہد ءُ ساہت پہ ساہت بدل بہ بنت'[24]۔ مڑاہداری ءَ انسان گچین نہ کنت بلکیں اے جہانی (universal) مولءُمرادے؛ ءُ انسان پہ اے مُراد ءِ زانگ ءَ درس دَیَگ بیت کہ وتی ذات ءَ بہ زانت۔ 'مڑاہداری ءَ ہمنچو پہ انسان ءَ گیشّینئے ءُ گیشگیوار کنئے، ہمنچو اے کار انسان ءَ ھیرواہی پرمایت پرچاکہ مڑاہداری بُن اسل ءَ 'زانت' اِنت[25]۔

انسانءِ وتارا زانگ یا وتی ذات ءَ زانگ 'مڑاہداری ءِ پہم اِنت کہ انسان ہمے پہم ءَ گوں دنیا ءَ چاریت ءُ تپّاسِیت'[26]۔ اے رِدءَ مڑاہداری یک راستیں کِردے۔ آئی ءِ زانگ پہ انسان ءَ اَنچیں ڈُبّایے کہ انسان پہ رضا آئی ءَ پُشت جت نہ کنت۔ پرچاکہ 'ادبداری یک رواجے نہ اِنت'[27]  ءُ نہ انسان ایشی ءَ پہ وتی پسند ءِ رِدءَ ٹہینت کنت بلکیں ’ادبداری ابرمی (natural) اِنت'[28] ءُ ایشی ءِ بُنزِہ انسان ءِ جند ءِ باتن اِنت۔ پمیشکا 'پہ ادبدار بُوَگ ءَ انسان ءَ اولسرا وتارا زانگی اِنت‘[29]۔ وتی زانگ ءِ پَد ءَ 'انسان ہرچی بہ  پہمیت، اے پہم ءِ تہا بےپلّوی (neutrality) اَلّم مانیت'[30]۔

چونائیا سُکریٹیز اے گپ ءَ نہ گیشّینیت آ کُجام شَرّیں کار اَنت کہ انسان ءَ مڑاہدار کننت۔ آ بس ہمنچو گوٛشیت کہ 'ھیر پہ انسان ءَ بےسیت نہ اِنت،ءُ سیتیں کِرد پہ انسان ءَ ھیر اِنت'[31]۔

****

---

[1]- William Lillie. An Introduction to Ethics. (London: Methuen & Co. Ltd. 1966), p. 94

[2]- M. I. Finley. The Ancient Greeks. (Middlesex: Penguin Books Ltd. 1966), p. 130

[3]۔ لَبز مَڑاہدار اِدءَ virtue ءِ مانا ءَ زُورگ بوتگ۔ اے رِدءَ مَڑاہدار ءِ مانا اِنت: مردمے ءِ جوٛان ءُ مڑاہداریں کِرد۔ مَڑاہداری ءِ اے مانا اوپسلا یونیورسٹی ءِ ڈکشنری ءَ چہ زُورگ بوتگ۔

[4]- Kazi Qaiser ul Islam. تاریخ فلسفہ مغرب. Vol. 1. (Islamabad: National Book Foundation.), p. 56

[5]- M. I. Finley. The Ancient Greeks., p. 130

[6]- R. A. P. Rogers. تاریخ اخلاقیات. Translated by Mulvi Ehsan Ahmed. (Karachi: City Book Point. 2006), p. 29

[7]- William S. Sahakian & Mabel Lewis Sahakian. Ideas of The Great Philosophers. (New York: Fall River Press. 2005), p. 33

[8]- Ibid, p. 32

[9]- Dr. Wilhelm Nestle. مختصر تاریخ فلسفہ یونان. Translated by Khalifa Abdul Hakeem. (Karachi: Nafees Academy. 1987), p. 87

[10]- Will Durant. The Pleasure of Philosophy. (Lahore: Services Book Club. 1995), p. 28

[11]- Dr. Wilhelm Nestle. مختصر تاریخ فلسفہ یونان., p. 87

[12]- Ibid,

[13]- Ibid, p. 90

[14]- Bertrand Russell. History of Western Philosophy. (London: Routledge. 1991), p. 109

[15]- Dr. Wilhelm Nestle. مختصر تاریخ فلسفہ یونان., p. 90

[16]- Bertrand Russell. History of Western Philosophy. , p. 109

[17]- Gerasimos Santas. The Socratic Paradox, in, Quarterly Journal, The Philosophical Review. Edited by Sage School of Philosophy. Cornell University. Vol. LXXIII. No. 2. (New York: Cornell University Press. April. 1964), p. 147

[18]- M. I. Finley. The Ancient Greeks., p. 130

[19]- William S. Sahakian & Mabel Lewis Sahakian. Ideas of The Great Philosophers. , p. 32

[20]- Ibid, p. 33

[21]- Ibid,

[22]- M. I. Finley. The Ancient Greeks., p. 130

[23]- Kazi Qaiser ul Islam. تاریخ فلسفہ مغرب., p. 57

[24]- R. A. P. Rogers. تاریخ اخلاقیات. , p. 29

[25]- Dr. Wilhelm Nestle. مختصر تاریخ فلسفہ یونان., p. 90

[26]- Kazi Qaiser ul Islam. تاریخ فلسفہ مغرب., p. 55

[27]- William Lillie. An Introduction to Ethics. (London: Methuen & Co. Ltd. 1966), p. 94

[28]- Ibid,

[29]- Ibid,

[30]- Gerasimos Santas. The Socratic Paradox. , p. 148

[31]- Dr. Wilhelm Nestle. مختصر تاریخ فلسفہ یونان., p. 91